رد على موعد الاجتماع

اننى اتسائل عن من قرر موعد هذا الاجتماع هل رئ ضروف القانتين فى جميع الفروع ومانعانيه من نقص فى توفر وسائل النقل التى تمكن اعضاء الائتلاف فى جميع الفروع من الحضور كما انه لم يراعا ضروفهم من حيث الاقامه الا اذا كان هذا الاجتماع المقصود به اعضاء الائتلاف فى طرابلس وضواحيها فهذا امر اخر ليس لنا به راى
ويجب ان نفرق بين كون الاداره العامه بطرابلس فهذا لايعنى انتما الائتلاف الى طرابلس فيجب مراعاة ضروف الاغلبيه لجميع الفروع ولاندرى ما سيتم طرحه فى هذا الاجتماع ووحينها ماسيتم طرحه سيصوت عليه من حضروا فقط وهذا امر اننى لااوافق عليه ما لم يتواجد ثلثى عدد المنتسبين لهذا الائتلاف..... واذا كان الغرض من هذا الاعلان هو تحصيل حاصل نحن اعلنا وانتم لم تاتوا ومن حضر يكفى ... فهنا اقول فى حال حدوث ذلك فهذا يعنى اننا نحن الغائبين لاضرورة لتواجدنا...
عليه اقترح ان يلغى هذا الموعد وان يحدد موعد الاجتماع فى منتصف شهر ديسمبر وان يعقد فى مدينة بنغازى حتى يتمكن الجميع من الحضور والعوده الى مدنهم.....
واتمنى ان لايتحدث احد عن امكانية الحضور عبر الاسكاى اوغيره ...فهذه الامور غير ميصوره للجميع
اتمنى ان اكون اوضحت راى واللذى اعتقد بانه راى جميع من يقطنون خارج حدود طرابلس
ارجوا ان تراعى ذلك يامن حددت موعد الاجتماع دون الاستفتاء عليه من جميع الاعضاء حتى ولو بالهاتف
لكم تحياتى

السلام عليكم ,,
اني نبي نسألك سؤال وياريت تجاوبني عليه ,,, هل الشعب الليبي وبالأخص ( الثوار) خذو رأي كل الليبيين لما حددو يوم 17 فبراير يوم للثورة ؟؟؟؟؟؟؟
احني يااخي الفاضل ما همشنا حد , وحددنا اليوم هذا بناء على الظروف , وانت تعرف لينا اكثر من شهر قبل موعد الاجتماع واحني نبرمجو امتى ويين بنديرو الإجتماع .
على العموم ان شاء الله حيكون فيه اجتماع تاني في بنغازي وياريت تكون معانا ,, ولما قلنا ايكون فيه تواصل حتى بالسكاي بي هذا اقتراح ...
وشكرا ,,,
ليلى التائب

السلام عليكم
مرحبتين خوى فيصل انا نبي نحكى شوى على موضوع الاجتماع
طبعاً يعتبر الاجتماع او الملتقى الاول اجتماع تعارفى وتعريف بالائتلاف وكان الحضور جيد بالنسبة للمنطقة الغربية والجنوب وهذة خطوة جيدة وانشاء الله حيكون الملتقى الثانى فى بنغازى حتى هو حيكون نفس الملتقى الاول...
لاكن بالنسبة لحضور الثلثى هذا صعب جداً لان احنا فى البداية منقدرش انوفر اقامة او تذاكر لأن موضوع الائتلاف تطوعى يعنى كل واحد من جيبة حتى ادارة الائتلاف كل واحد من جيبة الخاص وكلة مجهودات ذاتية لاكن احنا فكرنا فى فكرة اجتماعين علشان انوفقو بين المنطقتين يعنى احنا الى نمشو لان اذكان درنا الاجتماع فى بنغازى توة يزعلو جماعة الغرب واذكان درناة فى الغرب يزعلو جماعة الشرق ويزعلو جماعة الجنوب معش تنتهى ونقعدو معش اشتغلنا ويقعد الموضوع كلة نقد واعتراض
نحنا نبو نخدمو نبو نوصلو الى حل وسطى والى حد الان مدرنش اى قرار لان حيكون القرار بصوت الكل ...
اما لموضوع الاجتماع الجاى كان طلب الموظفين فى الاجتماع ايكون قريب قالو منبوش فى وقت طويل بين الاجتماع والاجتماع وانشاء الله هذا المواضيع ومواعيد الاجتماعات سوف توضع فى النظام الاساسى الذى سوف يعرض عليكم لاعتمادة واحنا من الاخير تأخرنا واجد والحمد الله والله كانت الخطوة الاولى جيدة
وضرورى من الاخطاء والحاجة الثانية طريقة الاعلان عن اجتماع حيكون فى وسائل الاعلام الرسمية والمنتدى والاتصال بالهاتف لبعض الناس الى متواصلين معنا لانى مش حنقدر انبلغ 1330 موظف
لاكن احنا انحاولو مع الاعلام انا انبلغو بالهاتف الى نعرفوة وعندنا رقمة وعن طريق الفروع وتوة نبو
ايديكم امعانا جاة وقت الجد وشكراً خوى فيصل على ملاحظاتك .....
والله اكبر والله اكبر

بسم الله


مشكور اخي عبدالناصر على هذا الرد والتبرير المنطقي الذي كان في محله ، واود الاشارة الى ضرورة عدم الاطالة في عقد الملتقى الثاني واحتواء اكبر عدد من الموظفين ليتم التعارف اكثر وتوحيد الصف والكلمة واقحام مؤسستنا ضمن المؤسسات المنوط بها اعباء مهمة قي الدولة الجديدة ...

وأتمنى ان يعقد الملتقى الثاني في مدينة بنغازي مهد ثورة 17 فبراير المجيدة ليتسنى لنا زيارتها ..



حفظ الله ليبيا

بسم الله

كل الاراء منطقية وواقعية

لكن ان عمال الوقت هو اهم شى علينا النهوض بالمصرف نحن كموظفين

ولايهم اذا كان الائتلاف ضمن نطاق العاصمة او فى اى مدينة بس اهم شى ان نكون يد واحدة
من اجل هدف واحد هو الموظف وتنميته

الان تم تحرير ليبيا والقضاء على كافة اشكال وازلام الطاغية وكلنا متفقون على ان نجتمع

المرحلة المهمة هى الان اذا لم نساهم ونطور فإننا سوف نضيع فى دوامة .. الجغرافيا والتأجيل الغير مبرر

بعد التحية ،،، واحترامي لكل اراء اخوتي.
انا من رأيئ لا نؤجل عمل اليوم الى الغد... ونحنا في وقت وظرف صعب وحساس وادا اصبح تاجيل الموعد المحدد للإجتماع اكيد سوف يتاخر النهوض بهذا اللإئتلاف والتقدم والتاخير لا يخدم المصلحة العامة.. وبخصوص الحضور نتمنى التكاثف من الموظفين ولابد من التضحية حتى وان كان على حسابك الخاص بالنسبة للسفر ومصاريف الاقامة..المهم ينعقد الإجتماع ونعتبره خطوة بداية والبدايةاصعب شئ..حتى نتدارك الأخطاء والإسراع في تصحيحها ومعالجتها ولايهم من قام بها او من فعلها ونضع صوب اعيننا ليبيا الجديدة ولإسراع للنهوض بليبيا وبناؤها ...والله ولي التوفيق...وانا اول العاملين على التوفيق لحضور الإجتماع والتنسيق مع بعض الموظفين للسفر حتى وان كان براً لايهم..ولكم تحياتي

السلام عليكم
بارك الله خوى محمد على الحماس الذى لديك للعمل لصالح عملك ووطنك واعطاء رأيك الجميل الذى يشجع الاخرين على الحماس للعمل التطويعى لخدمة هذا الوطن .